تازہ ترین
پھر کوئی بانگِ درا خوابِ گراں تک پہنچے / ڈاکٹر دلدار احمد علوی
پھر کوئی بانگِ درا خوابِ گراں تک پہنچے
کوئی آواز دروں خانہ ءِ جاں تک پہنچے
شرق تا غرب ہر اک پیر و جواں تک پہنچے
”میرا پیغام محبت ہے جہاں تک پہنچے“
اُس تبسم کی جھلک قلبِ تپاں تک پہنچے
کھل اٹھے غنچہ ءِ دل مشک جہاں تک پہنچے
میری مہجوری ءِ پیہم کابھی درماں یا رب
قافلے شوق کے اسرارِ نہاں تک پہنچے
حوصلے نے گل و گلزار کیا صحرا کو
پاؤں ہمت کے سرِ کوہستاں تک پہنچے
مر گئے گھٹ کے دم اپنے ہی نہاں خانے میں
دل کے ارمان بہت کم ہی زباں تک پہنچے
پیار کہتے ہیں جسے نام ہے قربانی کا
وہ تجارت ہے کہ جو سود و زیاں تک پہنچے
اتنا آسان نہ تھا عشق کی منزل کا سفر
زندگی ہم نے لٹائی تو یہاں تک پہنچے
تو نے جو آگ لگائی تھی مرے آنگن میں
اس کے شعلے ہیں جو یہ تیرے مکاں تک پہنچے
میرا کردار بھی ہے گردشِ ایام کے ساتھ
بے سبب نغمے نہیں آہ و فغاں تک پہنچے
زندگی پھونک چکی آتشِ فرقت دلدار
آگے یہ دشمنِ جاں جانے کہاں تک پہنچے
مصنف کے بارے میں
ضابطہ معاشرے میں آزادانہ مکالمے، افہام و تفہیم اور ترقی کے فروغ کے لیے کوشاں ہے۔ ضابطہ غیرجانبدارانہ معلومات، تعمیری گفتگو، اور متنوع نقطہ نظر کی طاقت پر یقین رکھتا ہے تا کہ ایک بہتر کل تشکیل دیا جا سکے۔
You Might Also Like
-
عالمی ذرائع ابلاغ کے مطابق چین نے موجودہ کشیدہ صورتحال میں ایران اور پاکستان سے صبر و تحمل سے کام لینے کی اپیل کی ہے۔ چین کی وزارتِ خارجہ کی جانب سے دونوں ممالک سے ایسے اقدامات سے اجتناب برتنے کا مطالبہ کی اہے جن سے کشیدگی میں اضافہ ہو سکتا ہے۔
-
ایران کی جانب سے پاکستانی حدود میں میزائل حملے کا منہ توڑ جواب دیتے ہوئے پاکستان نے ایرانی صوبہ سیستان میں دہشتگردوں کی پناہ گاہوں پہ حملہ کیا جس میں درجنوں دہشت گردوں کے ہلاک ہونے کی اطلاعات ہیں۔ پاکستان نے اس آپریشن کو "مرگ بر سرمچار" کا نام دیا ہے۔ دفتر خارجہ کی ترجمان...
Facebook Comments