USNews Logo

اداکارہ حمیرا اصغر کی پراسرار موت کے کیس میں نیا موڑ سامنے آیا ہے، جب فرانزک تجزیے میں ڈیفنس فیز 6 میں واقع ان کے فلیٹ سے ملنے والے پیالوں میں سمندری نمک کی موجودگی کی تصدیق ہوئی۔

رپورٹ کے مطابق جائے وقوعہ سے کل چھ نمونے لیے گئے، جن میں پانچ پیالوں سے اور ایک کچن کے نمک سے حاصل کیا گیا۔ تجزیے میں پتہ چلا کہ پیالوں میں موجود سفوف سمندری نمک تھا جبکہ کچن کا نمک اس سے کیمیائی طور پر مختلف تھا۔

تحقیقاتی حکام کے مطابق سمندری نمک عموماً بدبو ختم کرنے اور کیڑوں کو دور رکھنے کے لیے استعمال ہوتا ہے۔ پیالوں میں اس خاص نمک کی موجودگی نے اس کے ممکنہ مقاصد پر شکوک پیدا کر دیے ہیں، اور یہ واقعے کی تہہ تک پہنچنے میں معاون ثابت ہو سکتا ہے۔

حمیرا اصغر کی لاش 8 جولائی کو اتحاد کمرشل ایریا، ڈیفنس فیز 6 میں ان کے فلیٹ سے اس وقت ملی جب کرایہ ادا نہ کرنے پر عدالتی بیلف نے زبردستی دروازہ کھلوایا۔ ابتدائی پوسٹ مارٹم رپورٹ کے مطابق، وہ تقریباً آٹھ ماہ قبل وفات پا چکی تھیں۔ آخری بار انہیں ستمبر 2024 میں کسی کمرشل شوٹ میں دیکھا گیا تھا۔