بھارت کے پاکستان کی نورخان، مرید اور شورکوٹ ایئر بیسز پر حملے ناکام، ترجمان پاک فوج

ڈی جی آئی ایس پی آر لیفٹیننٹ جنرل احمد شریف چودھری نے ہنگامی میڈیا بریفنگ میں انکشاف کیا کہ بھارت نے پاکستان کے تین اہم ایئر بیسز — نورخان، مرید اور شورکوٹ — پر فضا سے زمین پر مار کرنے والے میزائل داغے، تاہم پاک فضائیہ کے دفاعی نظام نے ان حملوں کو ناکام بنا دیا اور تمام فضائی اثاثے محفوظ رہے۔

انہوں نے کہا کہ نورخان ایئر بیس کے قریب بھارت کی ایک کارروائی کو بروقت ناکام بنایا گیا، اور فضا میں متعدد میزائلوں کو تباہ کیا گیا۔ کچھ میزائل ایئر بیسز کے حدود میں گرے مگر کوئی جانی یا مالی نقصان نہیں ہوا۔

ترجمان پاک فوج نے مزید انکشاف کیا کہ بھارت نے افغانستان کی حدود میں بھی میزائل داغے، جو پورے خطے کو جنگ کی آگ میں جھونکنے کی بھارتی کوششوں کا حصہ ہیں۔ ان کا کہنا تھا کہ بھارت کے میزائل حملوں کے الیکٹرانک شواہد پاکستان کے پاس موجود ہیں، اور یہ کارروائیاں بھارت کی بزدلانہ سوچ اور غیر ذمہ دار رویے کو ظاہر کرتی ہیں۔

اس سے قبل ایک اور ہنگامی پریس بریفنگ میں ڈی جی آئی ایس پی آر نے بتایا کہ بھارت نے آدم پور سے 6 بیلسٹک میزائل فائر کیے جن میں سے 5 بھارتی شہر امرتسر اور ایک آدم پور میں گرا۔ انہوں نے کہا کہ بھارت جان بوجھ کر سکھ برادری کو نشانہ بنا رہا ہے، اور پاکستان سکھوں کے ساتھ مکمل ہمدردی رکھتا ہے اور بھارتی ریاستی دہشت گردی کی سخت مذمت کرتا ہے۔

ضَابِطَہ

مصنف کے بارے میں

ضابطہ معاشرے میں آزادانہ مکالمے، افہام و تفہیم اور ترقی کے فروغ کے لیے کوشاں ہے۔ ضابطہ غیرجانبدارانہ معلومات، تعمیری گفتگو، اور متنوع نقطہ نظر کی طاقت پر یقین رکھتا ہے تا کہ ایک بہتر کل تشکیل دیا جا سکے۔