USNews Logo

پاکستانی شوبز انڈسٹری کی معروف اداکارہ ماہرہ خان نے کہا ہے کہ دنیا میں کوئی بھی کامیاب شخص حقیقت میں ’سیلف میڈ‘ نہیں ہو سکتا اور نہ ہی کوئی مکمل طور پر سیلف میڈ ہوتا ہے۔

ماہرہ خان کی ایک مختصر ویڈیو سوشل میڈیا پر وائرل ہو رہی ہے جس میں وہ خاندان اور دوستوں کے تعاون کی اہمیت پر بات کر رہی ہیں۔ ویڈیو میں انہوں نے واضح کیا کہ کسی بھی کامیابی کے پیچھے اہل خانہ اور قریبی افراد کا کردار لازمی ہوتا ہے۔

ایک تقریب کے اختتام پر اداکارہ سے پوچھا گیا کہ انہوں نے تقریب کے دوران خاندان اور دوستوں کے تعاون پر روشنی ڈالی، اس پر وہ مزید کیا کہنا چاہیں گی؟ اس پر ماہرہ خان نے کہا کہ انہوں نے تقریب میں یہی کہا کہ ’سیلف میڈ‘ محض ایک دلکش اصطلاح ہے، لیکن حقیقت میں ایسا کچھ نہیں ہوتا۔

اداکارہ کا کہنا تھا کہ آج وہ جس مقام پر ہیں، اس میں ان کے والدین، بھائی، بیٹے، اور دوستوں کا بے حد تعاون شامل ہے۔ انہوں نے مزید کہا کہ ان کی کامیابی میں ان کے کام کے ساتھیوں اور نئے لوگوں سے ملنے اور ان کے تعاون کا بھی اہم کردار رہا ہے۔ ماہرہ خان کے مطابق، حقیقت یہی ہے کہ کوئی بھی شخص اپنی کامیابی میں اکیلا نہیں ہوتا۔