USNews Logo

وہ نابینا تھی۔ لیکن اس کے پاس سفید چھڑی کی بجائے کیمرہ ہوتا تھا۔
اچھے لوگ جو دوسروں پر ہنستے نہیں ہیں اور دوسروں کا بہت خیال رکھتے ہیں۔وہ ہمدردی جتاتے ہوئے اس سے کہتے کہ وہ سفید چھڑی ضرور پاس رکھا کرے۔اس سے راستے کی مشکلات میں کمی واقع ہو جاتی ہے اور دیکھنے والے لوگ محتاط ہو جاتے ہیں۔
 وہ تحمل سے جواب دیتی ”ایک تو میں آنکھوں سے نہیں پورے جسم سے دنیا کو محسوس کرتی ہوں۔ دوسرا، میں کیوں اپنے متعلق لوگوں کو محتاط ہونے کا موقع دوں۔ انھیں اپنی بینائی پر ناز ہے تو آئیں۔ انتہائی غیر محتاط ہو کر تشریف لائیں“۔
وہ سوچتی میں آنکھوں کے نہ ہونے کا عذاب، اپنے باقی اعضا کو کیوں دوں؟ جبکہ وہ تو جوان اور تندرست ہیں۔ میں اپنے اعضا کی خواہشوں کا گلا گھونٹنا دانش مندی نہیں سمجھتی۔
اسے گلے میں کیمرہ لٹکائے دیکھ کر وہ لوگ جو آنکھیں رکھتے تھے…… یقینا یہی وہ لوگ تھے جو دوسروں کا خیال رکھتے ہیں اور لوگوں کا ٹھٹھہ نہیں اڑاتے…… وہ خوش ہوتے اور کہتے ”یہ ہے وہ بینا لڑکی، جو اڑتے پرندوں کی آواز سن کر تصویر کھینچ لیتی ہے اور پرندہ پر بھی نہیں مار سکتا“
اس کی تصویروں میں درخت پورے پس منظر کے ساتھ موجود ہوتے تھے۔ گویا اس پر صرف منظر واضح نہیں تھے۔ وہ بہت دور تک چیزوں کو محسوس کر لیتی تھی۔
اس کی البم میں شام کے مناظر دیدنی ہوتے تھے۔لوگ سرمئی تصویریں دیکھ کر ایک دوسرے سے سرگوشی کرتے ”کیا اسے بادلوں کے ٹکڑوں میں لگی آگ کی تپش بھی محسوس ہوتی ہے؟“
اس کے البم میں ”حاصلِ البم“ وہ تصویریں تھیں۔ جن میں غیر محتاط لوگوں کی گھورتی آنکھیں ایسے زاویے سے نمایاں تھیں کہ ان کے سرخ ڈورے شفق کی طرح بجھتے افق کو روشن کیے ہوئے تھے۔ یقینا یہ ان لوگوں کی آنکھیں تھیں جو سفید چھڑی کے بغیر ہر فرد کو آنکھوں والا سمجھتے ہیں۔